| Kurzgeschichten > Geschichtliches |
 |
|
Frou vo Pfyffepäggeli
von Marc P Sahli >>
Verwaltigsamt, my Name isch Sahli, wie chani hälfe? Grüessech Frou Fischer - ‘Vo Fischer‘ tönts usem Telefonhörer. Mir chunt grad nüt y Sinn. U enfin quelqu‘un, hani nume dänkt. Ja die hei ja d‘ Bärner Post gründet. Regimäntsfähigs Gschlächt, Patrizier us Bärn. Usem ancien régime. U plötzlech chunnt mir y däm Zämehang d‘Madam Dö y Sinn, wahrschynlech der letscht Findling usem Ancien Régime, gläbt het sie 1882 - 1980. D’ Madam de Meuron isch y pächschwarze, wallende Gwänder u mit grossem Huet u Hör-Rohr z Bärn unterwägs gsy, unger de Loube mitem Schlüsselbund wo chlefelet. Sie het ihri Wohnige ar Junkere inspiziert. Ihri 2 Barsoi Hünd het sie bim Rizzi Beck aabunde gha. Bim wieder abhole, het sie de no 2 Tartelettes g’chouft. U we der alt Rizzi ume isch gsy, de het sie d‘Hünd vore aabunde la sy u isch düre Hinterusgang etschlüpft. D’ Hünd het me natürlech g’chennt, u me het se zu ihre wieder hei brunge. Ja, me kennt d‘Erschynig vor Madam Dö, wie me d’ Elisabeth de Meuron-von Tscharner volkstümlech benamset het, bis hüt u vorallem d’Anekdote über se; nid alli sy wahren Ursprungs. Sälber het sie gseit: d’Helfti isch erfunde und die anderi Helfti isch gloge.Sie het gärn Regierungsrät u s Militär gha, aber gredt het sie nume mit dene, vom Rang Major a ufwärts. Darum het sie öpe uf ihrem Schloss sogenannti Concours hippiques verastaltet. U a somene Rytturnier hei d’ Gescht vor Züpfe gfrässe, dass sie fasch verworgget sy u Wysse abegeschüttet, um genau das z verhindere. S feine Eberfleisch het d‘Gaschtig nid mit em Füdle aagluegt, es tüeii böckele hei sie la verlute. Mon dieu, aber tellement schnäderfräsig. |
|
|
Seite
von 2 |
|
|
| Kommentare (0) |
|
