| Kurzgeschichten > Humor |
 |
|
Dr Emanuel, dr Elia und d’Ariane spitze d’Ohre.
«Nei», meint ds Grosstanti u schuflet e Bitz Williamsturte yne, «was mi derart ggergeret het, isch die teutonischi Wortwahl ‘nackti Männer’! Wenn isch üses schöne Bärndütsch o nume in Richtung grosse Kanton abboge? Bi üs seit me geng no ‘blutti Manne’!!»
Alli halte spürbar d Luft aa. D Chind am Tisch rangge unruehig und mache grossi Ouge, luege einisch dr Vati Kilian a und im nächschte Ougeblick ds Mueti Elisabeth.
D’Schnapsturte isch chüschtig. Ds Tanti nimmt e zwöite Bitz. D Elisabeth schufletne mit em silbrige Turteheber übere ufs Porzellantäller vom Tanti. Ds Tanti nickt. D Elisabeth lächlet usicher.
D Schnapsturte lockeret d Atmosphäre u o s Language vom Tanti. Sie nuhm gärn es Schnäpsli seit ds Kläri zum Kilian. Es Williämsli passti guet zur Turte.
«Was hani wölle säge?», fragt ds Tanti. Weder d’Elisabeth no dr Kilian wei sech erinnere. D’Chind no weniger. «Ah ja», seit ds Tanti zwüsche me ne Schlückli Schnaps und emne Bitz Turte, «mir hei früecher alben es Liedli gsunge: i dr EPA, i dr EPA, i dr EPA cha me ha, für füfezwänzg Rappen e füdleblutte Maa»… «Das sy no Zyte gsy, säg i nech, das sy no Zyte gsy!» seit ds Tanti u sürflet vom Ggaffee und vo ihrem Schnäpsli. Ds Tante Kläri isch e chly errötet, wüll es sech echauffiert het, wahrschynlech wägem Singe oder vilech macht o dr Williams e chly warm. (c) Marc P Sahli, 2023
16. April 2023 |
|
| zurück |
Seite
von 2 |
|
|
| Kommentare (1) |
|
